Будаўніча-тэхнічная экспертыза

Прадмет

Прадметам будаўніча-тэхнічнай экспертызы з’яўляюцца акалічнасці справы, якія адносяцца да вызначэння даных, звязаных з працэсам будаўніцтва, праектаваннем, эксплуатацыяй, рамонтам будынкаў і збудаванняў.

Аб’ект

• будынкі, асобныя збудаванні, канструктыўныя элементы будынкаў, іх часткі, будаўнічыя матэрыялы і вырабы, будаўнічыя пляцоўкі;
• праектна-каштарысная дакументацыя на правядзенне будаўніча-мантажных і рамонтна-будаўнічых работ, акты прыёмкі будынкаў у эксплуатацыю, тэхнічныя пашпарты на ўведзеныя ў эксплуатацыю будынкі;
• дагаворы на выкананне будаўніча-мантажных і рамонтна-будаўнічых работ, акты прыёмкі выкананых работ, акты прыёмкі схаваных работ, журналы пааперацыйнага кантролю, праект правядзення работ, журнал правядзення работ, журнал аўтарскага нагляду;
• акты і рашэнні аб адвядзенні зямельнага ўчастка пад будаўніцтва і праектаванне аб’екта, архітэктурна-планавальнае заданне на распрацоўку праектна-каштарыснай дакументацыі;
• акты кантрольных абмераў, абследавання няякасна выкананых будаўніча-мантажных і рамонтна-будаўнічых работ;
• акты аб няшчасных выпадках і акты расследавання будаўнічых аварый, а таксама акты спецыяльнага ведамаснага расследавання, прадпісанні канкрэтных устаноў;
• іншая дакументацыя, у залежнасці ад акалічнасцяў справы, якая разглядаецца.

Задачы

• вызначэнне выдаткаў, якія адносяцца да матэрыяльнай шкоды, прычыненай будынку, збудаванню ў выніку падпалу, заліцця, выбуху ці іншага здарэння;
• вызначэнне варыянтаў падзелу домаўладання (жылога дома, зямельнага ўчастка) з улікам долей у праве ўласнасці, а таксама разлік грашовай кампенсацыі за адхіленне фактычна вылучаных долей ад долей у праве ўласнасці;
• вызначэнне адпаведнасці (неадпаведнасці) фактычных меж зямельнага ўчастка юрыдычным межам;
• вызначэнне вартасці аб’екта нерухомай маёмасці;
• вызначэнне аб’ёмаў, якасці, вартасці выкананых будаўніча-мантажных і рамонтна-будаўнічых работ;
• вызначэнне адпаведнасці вызначанага ініцыятарам прызначэння экспертызы фактычнага парадку правядзення будаўніча-мантажных і рамонтна-будаўнічых работ патрабаванням аховы працы і тэхнікі бяспекі ў будаўніцтве;
• вызначэнне прычын надыходу аварый у працэсе выканання будаўніча-мантажных, рамонтна-будаўнічых работ ці ў працэсе эксплуатацыі будаўнічых аб’ектаў.